ສົງຄາມການຄ້າກະທົບຮຸ່ນໂລກຕົກຢ່າງໜັກ ຈີນເອົາຄືນສະຫະລັດເລີ່ມທີ່ຊີ້ນໝູ (ຄລິບ)

 ວັນທີ່ 23​ ມີນາ 2018 ເອພີລາຍງານສະຖານະການຄວາມຕຶງຄຽດໃນສົງຄາມການຄ້າທີ່ປະທານາທິບໍດີ ໂດໂນລ ທຣັມ ໄດ້ປະກາດເສິກກັບຈີນ ເຊີ່ງຂະນະນີ້ທາງກະຊວງການຄ້າຈີນເປີດລາຍຊື່ສິນຄ້າທີ່ຈະຮຽກເກັບພາສີຈາກສະຫະລັດແລ້ວເປັນຊຸດທຳອິດ ຄາດວ່າຈະມີມູນຄ່າປະມານ 3000 ລ້ານໂດລາ ຕອບໂຕ້ທີ່ ທຣັມ ລົງນາມສ້າງກຳແພງພາສີກັບຈີນຢ່າງໜັກໜ່ວງເຊີ່ງກວມເອົາສິນຄ້າຈີນເຖີງ 25%.

ສິນຄ້າທີ່ຄາດວ່າຈີນຈະຕອບໂຕ້ສະຫະລັດອັນດັບຕົ້ນໆໄດ້ແກ່ ຊີ້ນໝູ ໝາກໄມ້ສົດ ວາຍ ແລະ ທໍ່ເຫຼັກ. ຂ່າວດັ່ງກ່າວເຮັດໃຫ້ລາຄາຮຸ່ນຂອງບໍລິສັດທີ່ເຮັດກິດຈະການດັ່ງກ່າວຕົກລົງຢ່າງໜັກ ເຊັ່ນດຽວກັບຕະຫຼາດຮຸ່ນທົ່ວໂລກທີ່ຕ່າງຢ້ານກັບເສິກຄັ້ງນີ້ ເພາະທັງສອງມະຫາອຳນາດບໍ່ມີທ່າທີວ່າຈະຢຸດ ພາຍຫຼັງ ທຣັມ ກ່າວຫາວ່າຈີນລັກເທັກໂນໂລຍີ ຊັບສິນທາງປັນຍາຂອງສະຫະລັດ ສ່ວນຈີນຕອບໂຕ້ວ່າເຖີງວ່າຈະບໍ່ຢາກເຮັດສົງຄາມການຄ້າ ແຕ່ກໍ່ບໍ່ຢ້ານເລີຍແມ່ນແຕ່ນ້ອຍ ເພາະໝັ່ນໃຈວ່າຮັບມືໄຫວ.