ແຈ້ງຈັບຜູ້ຮັບຊື້ ຂະຫຍາຍຜົນໄດ້ຜູ້ລັກອີກ 2 ຄົນ

ອີກລາຍຄະດີທີ່ໄດ້ຮັບການຮ່ວມມື ຈາກປະຊາຊົນ ໃນການມ້າງກຸ່ມແກ້ງລັກລົດຈັກ ຢູ່ເມືອງໄກສອນ ພົມວິຫານ ແຂວງສະຫວັນນະເຂດ ຈົນສາມາດຂະຫຍາຍຫາຜູ້ຮ່ວມຂະບວນກນໍາກັນອີກ 2 ຄົນ ພ້ອມຂອງກາງລົດຈັກທີ່ພວກກ່ຽວລັກມາ ໄດ້ 4 ຄັນ. ເບື້ອງຕົ້ນໃນເດືອນກໍລະກົດ 2017 ມີປະຊາຊົນ ຢູ່ບ້ານໂພນສະອາດ ເມືອງໄກສອນ ພົມວິຫານ ເຂົ້າແຈ້ງຄວາມຕໍ່ເຈົ້າໜ້າທີ່ ປກສ ກຸ່ມ 6 ເມືອງໄກສອນ ພົມວິຫານ ວ່າ: ທ້າວ ເທ້ ອາຍຸ 18 ຢູ່ບ້ານໂພນສະອາດ ເມືອງໄກສອນ ພົມວິຫານ ໄດ້ຮັບຊື້-ຂາຍລົດຈັກແບບຜິດກົດໝາຍ ທີ່ໄວລຸ້ນຈໍານວນໜຶ່ງໄປຂາຍໃຫ້ ຈໍານວນຫຼາຍຄັ້ງ.

ຈາກນັ້ນ, ໃນທ້າຍເດືອນກໍລະກົດ 2017 ເຈົ້າໜ້າທີ່ ປກສ ກຸ່ມ 6 ຈຶ່ງເຂົ້າກວດກາເບິ່ງລົດຈັກຢູ່ເຮືອນ ທ້າວ ເທ້ ຈຶ່ງພົບເຫັນລົດຈັກ 1 ຄັນ ກວດກາບໍ່ມີເອກະສານ ຈຶ່ງຢຶດລົດຈັກໄວ້ ພ້ອມທັງກັກຕົວ ທ້າວ ເທ້ ແລ້ວສົ່ງໃຫ້ເຈົ້າໜ້າທີ່ວິຊາສະເພາະ ປກສ ເມືອງໄກສອນ ພົມວິຫານ ດໍາເນີນການສອບສວນ. ຜ່ານການສອບສວນ ທ້າວ ເທ້ ຮັບສາລະພາບວ່າ: ລົດຈັກຄັນດັ່ງກ່າວ ແມ່ນຮັບຊື້ຈາກໝູ່ຮ່ວມຂະບວນການນໍາກັນ ລັກໄປຂາຍໃຫ້. ຮອດວັນທີ 4 ສິງຫາ 2017 ເຈົ້າໜ້າທີ່ ປກສ ເມືອງໄກສອນ ພົມວິຫານ ໄດ້ປະສານສົມທົບກັນເຈົ້າໜ້າທີ່ ປກສ ເມືອງຈຳພອນ ແຂວງສະຫວັນນະເຂດ ຕິດຕາມກັກຕົວໄດ້ 2 ຄົນ ຕາມການຊັດທອດ ຊື່ ທ້າວ ເພັດສະໝອນ ຫຼື ຕ່າຍ ອາຍຸ 17 ປີ ບ້ານໂພນສະອາດ ແລະ ທ້າວ ແສງສຸລີ ຫຼື ໂອໂມ້ ອາຍຸ 30 ປີ ບ້ານສະພານເໜືອ ຢູ່ເມືອງໄກສອນ ພົມວິຫານ ແຂວງສະຫວັນນະເຂດ, ພ້ອມຂອງກາງປະເພດລົດຈັກ ຈໍານວນ 4 ຄັນ. ນອກນີ້, ພວກກ່ຽວຍັງຊັດທອກດຫາຜູ້ຮ່ວມຂະບວນການນໍາກັນອີກ ຊື່ ທ້າວ ສຸເທບ ຫຼື ຫົວເປ ອາຍຸ 27 ປີ ບ້ານສະພານເໜືອ ເມືອງໄກສອນ ພົມວິຫານ ໄດ້ຮ່ວມກັນເຄື່ອນໄຫວລັກລົດຈັກ ໂດຍຜູ້ກ່ຽວເຄື່ອນໄຫວລັກລົດຈັກມາແຕ່ເດືອນ 6 ມີຖຸນາ 2017 ເຊິ່ງລັກມາແລ້ວ 17 ຄັ້ງ ໄດ້ລົດຈັກທັງໝົດ 17 ຄັນ. ການລັກແຕ່ລະຄັ້ງແມ່ນໄດ້ເອົາໄປຂາຍ ແລ້ວແບ່ງເງິນກັນ. ສ່ວນຫຼາຍແມ່ນເອົາໄປຊື້ຢາບ້າມາເສບ ແລະ ຫຼິ້ນກິນຟຸມເຟືອຍ. ສ່ວນ ທ້າວ ສຸເທບ ແມ່ນເອົາຕົວຫຼົບໜີ ເຈົ້າໜ້າທີ່ກໍາເລັ່ງຕິດຕາມໄປດໍາເນີນຄະດີຕາມກົດໝາຍ.

ຂ່າວໃຫ້ຮູ້ຕື່ມອີກວ່າ: ວັນທີ 27 ສິງຫາ 2017, ເຈົ້າໜ້າທີ່ ປກສ ເມືອງໄກສອນ ພົມວິຫານ ແຂວງສະຫວັນນະເຂດ ໄດ້ຮັບແຈ້ງຄວາມຈາກ ນາງ ສີສົມພອນ ອາຍຸ 50 ປີ ອາຊີບຄ້າຂາຍ ບ້ານລັດຕະນະລັງສີເໜືອ ເມືອງໄກສອນ ພົມວິຫານ ວ່າ: ມີຄົນຮ້າຍໄດ້ເຂົ້າມາລັກເຄື່ອງໃນເຮືອນ ເຊິ່ງມີເຄື່ອງເສຍຫາຍຄື ໂທລະທັດ 62 ນິ້ວ 1 ໜ່ວຍ, ສິ້ນໄໝຈຳນວນ 30 ຜືນ, ເຄື່ອງຫຼີ້ນຊີດີ 1 ໜ່ວຍ ລວມມູນຄ່າ ປະມານ 40 ລ້ານກີບ. ຈາກນັ້ນ, ເຈົ້າໜ້າທີ່ ປກສ ເມືອງໄກສອນ ພົມວິຫານ ໄດ້ສົມທົບກັບເຈົ້າໜ້າທີ່ ປກສ ແຂວງສະຫວັນນະເຂດ ລົງກວດກາເກັບກຳຂໍ້ມູນສະຖານທີ່ເກີດເຫດ; ໃນເບື້ອງຕົ້ນຈຶ່ງຮູ້ວ່າ: ຄົນຮ້າຍໄດ້ງັດປະຕູຂ້າງເຮືອນ ເຂົ້າໄປລັກເອົາເຄື່ອງຂອງທີ່ມີຄ່າໜີ້ໄປ. ຜ່ານການເກັບກໍາຂໍ້ມູນຫຼັກຖານ ພ້ອມທັງຕິດຕາມເປົ້າໝາຍ ແລະ ສາມາດກັກຕົວຜູ້ກໍ່ເຫດໄດ້ ໃນວັນດຽວກັນ ຊື່ ທ້າວ ອັອດ ອາຍຸ 26 ປີ, ບ້ານສຸນັນທາ ແລະ ທ້າວ ພູດຄຳ ຫຼື ໝາ ອາຍຸ 30 ປີ ບ້ານນາແຮ່ ຢູ່ເມືອງໄກສອນ ພົມວິຫານ ແຂວງສະຫວັນນະເຂດ.

ຜ່ານການສອບສວນ-ສອບສວນ ພວກກ່ຽວທັງສອງຮັບສາລະພາບວ່າ: ໄດ້ຮ່ວມມືກັນວາງແຜນລົງມືລັກຊັບໃນຄັ້ງນີ້ແທ້ ໂດຍໃຫ້ ທ້າວ ອັອດ ທີ່ເປັນຫຼານເຂີຍຜູ້ເສຍຫາຍ ງັດເຂົ້າໄປໃນເຮືອນ ແລ້ວໄຂປະຕູໃຫ້ ທ້າວ ພູຄຳ ຫຼື ໝາ ແລະ ທ້າວ ກວາງເຂົ້າມາລັກເອົາເຄື່ອງຈຳນວນດັ່ງກ່າວ ຫຼັງຈາກລັກໄດ້ແລ້ວກໍພາກັນເອົາເຄື່ອງດັ່ງກ່າວ ໄປຊຸກເຊື່ອງໄວ້ຢູ່ເຮືອນ ທ້າວ ໝາ ເພື່ອຈະເອົາໄປຂາຍ ແຕ່ຖືກເຈົ້າໜ້າທີ່ກັກຕົວໄດ້ກ່ອນ. ສ່ວນ ທ້າວ ກວາງ ອາຍຸ 25 ປີ ບ້ານທ່າແຮ່ ເມືອງໄກສອນ ພົມວິຫານ ເອົາຕົວຫຼົບໜີ ເຈົ້າໜ້າທີ່ຕໍາຫຼວດກໍາລັງຕິດຕາມຕົວໄປດໍາເນີນຄະດີຕາມກົດໝາຍ.

 ແຫຼ່ງທີ່ມາ:ໜັງສືພິມຄວາມສະຫງົບ