ຈັບຜູ້ລັກ ຂະຫຍາຍຜົນຫາຜູ້ຮັບຊື້

ບັນຫາລັກຊັບພົນລະເມືອງ ໂດຍສະເພາະລັກລົດຈັກ ເປັນປະກົດການຊໍາເຮື້ອມາດົນນານ ເຖິງວ່າເຈົ້າໜ້າທີ່ຕໍາຫຼວດ ໄດ້ມີການແກ້ໄຂ ແລະ ປາບປາມກຸ່ມດັ່ງກ່າວ ແຕ່ຍັງມີອີກຈໍານນວນໜຶ່ງສືບຕໍ່ເກີດຂຶ້ນເລື້ອຍໆມາ ເຊິ່ງວິທີການພວກເຂົາແມ່ນເຮັດເປັນກຸ່ມກ້ອນ, ເປັນລະບົນຕ່ອງໂສ້ ເຊັ່ນ: ຈໍານວນໜຶ່ງຊອກລັກສະເພາະ ແຕ່ຈໍານວນໜຶ່ງຮັບຊື້ ແລ້ວດັດແປງສະພາບລົດຈັກກ່ອນອອກສົ່ງຂາຍ. ດັ່ງຄືຄະດີລາຍນີ້, ໃນເດືອນກໍລະກົດ 2017 ເຈົ້າໜ້າທີ່ກອງຄະດີອາຍາ ປກສ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັບຕົວ ທ້າວ ໂຕ ອາຍຸ 21 ປີ ຢູ່ບ້ານຫ້ວຍນໍ້າເຢັນ ເມືອງນາຊາຍທອງ ເປົ້າໝາຍລັກຊັບພົນລະເມືອງ (ລັກລົດຈັກ); ຈາກນັ້ນ, ເຈົ້າໜ້າທີ່ຕໍາຫຼວດ ຂະຫຍາຍຜົນຕິດຕາມກັກຕົວຜູ້ຮັບຊື້ໄດ້ ຊື່ ທ້າວ ມິລີນດ່າ ຫຼື ແມວ ອາຍຸ 35 ປີ ຢູ່ບ້ານນາໜາດ ເມືອງນາຊາຍທອງ ນະຄອນຫຼວງວຽງຈັນ ຂໍ້ຫາຮັບຊື້ລົດຈັກ ຜິດກົດໝາຍ ພ້ອມຂອງກາງມາດໍາເນີນຄະດີ.

ທ້າວ ໂຕ ຮັບສາລະພາບວ່າ: ຜ່ານມາ, ໄດ້ເຄື່ອນໄຫວລັກລົດຈັກມາແລ້ວ 3 ຄັ້ງ ໄດ້ລົດຈັກ 3 ຄັນ ພາຍຫຼັງລັກລົດຈັກໄດ້ແລ້ວ ກໍນໍາໄປຂາຍໃຫ້ກັບ ທ້າວ ມິລີນດ່າ. ຄັ້ງຫຼ້າສຸດໃນທ້າຍເດືອນມິຖຸນາ 2017 ໄດ້ຮ່ວມກັບ ທ້າວ ລາມ ບ້ານດຽວກັນ ໄປລັກເອົາລົດຈັກເວບ 100 ສີແດງດໍາ ພາຍຫຼັງໄດ້ລົດຈັກມາແລ້ວ ກໍນໍາໄປຂາຍໃຫ້ກັບ ທ້າວ ວິລີນດ່າ ໃນລາຄ່າ 1.000.000 ກີບ ແລ້ວແບ່ງເງິນກັນໄປຊື້ຢາບ້າມາເສບ. ຈາກນັ້ນ, ມາວັນທີ 3 ກໍລະກົດ 2017 ໄດ້ຖືກເຈົ້າໜ້າທີ່ເຂົ້າກັກຕົວຢູ່ເຮືອນ ມາດໍາເນີນຄະດີ. ນອກນັ້ນ, ທ້າວ ໂຕ ຍັງສາລະພາບອີກວ່າ: ໄດ້ເລີ່ມພົວພັນເສບຢາເສບຕິດ ແຕ່ປີ 2010 ເປັນຕົ້ນມາ, ຢາບ້າທີ່ນໍາມາເສບແມ່ນຊື້ນໍາໄວລຸ້ນພາຍໃນບ້ານ. ມາປີ 2013 ຖືກຜູ້ປົກຄອງນໍາໄປຝາກບໍາບັດຢູ່ສູນສົມສະຫງ່າ ເປັນເວລາ 1
ປີ ພາຍຫຼັງອອກມາຈາກສູນບໍາບັດ ກໍກັບມາເສບຢາບ້າຄືນໃໝ່ອີກ ແລະ ເຄື່ອນໄຫວລັກຊັບຂອງພົນລະເມືອງ ເພື່ອຫາເງິນຊື້ຢາບ້າມາເສບ.

ທ້າວ ມິລິນດ່າ ສາລະພາບວ່າ: ໄດ້ຮັບຊື້ລົດຈັກທີ່ ທ້າວ ໂຕ ແລະ ທ້າວ ລາມ ທີ່ລັກມາຂາຍໃຫ້ຫຼາຍຄັ້ງ, ພາຍຫຼັງຊື້ມາແລ້ວ ກໍນໍາໄປຂາຍຕໍ່ອອກຕ່າງແຂວງ. ລົດຈັກທີ່ຮັບຊື້ແຕ່ລະຄັນ ສ່ວນຫຼາຍແມ່ນດັດແປ່ງສະພາບກ່ອນ ໂດຍປ່ຽນແປງສີ ແລ້ວນໍາໄປຂາຍ; ຈາກນັ້ນ, ກໍເອົາເງິນໄປຊື້ຢາບ້າ ແລະ ປືນດັດແປງ 1 ກະບອກ. ມາວັນທີ 3 ສິງຫາ 2017 ໄດ້ຖືກເຈົ້າໜ້າທີ່ເຂົ້າກັກຕົວຢູ່ເຮືອນ ພ້ອມກັບນໍາເກັບກູ້ລົດຈັກໄດ້ 1 ຄັນ ເພື່ອນໍາໄປມອບຄືນເຈົ້າຂອງເດີມ. ສ່ວນປືນ ຜູ້ກ່ຽວໄດ້ໄປຊື້ນໍາ ທ້າວ ໄຊ ອາຍຸ 38 ປີ ຢູ່ບ້ານບໍ່ ເມືອງທຸລະຄົມ ແຂວງວຽງຈັນ ໃນລາຄາ 400.000 ກີບ ພ້ອມລູກປືນ 5 ລູກ ເພື່ອນໍາປືນມາເກັບຮັກສາໄວ້ປ້ອງກັນຕົວ.

ນອກນັ້ນ, ທ້າວ ມິລີນດ່າ ສາລະພາບອີກວ່າ: ຜູ້ກ່ຽວໄດ້ເລີ່ມເສບຢາບ້າ ແຕ່ປີ 2005 ເປັນຕົ້ນມາ, ມາປີ 2007 ຖືກເຈົ້າໜ້າທີ່ ປກສ ເມືອງນາຊາຍທອງ ກັກຕົວໃນຂໍ້ຫາມົ້ວສຸມຢາເສບຕິດ, ຖືກກັກຂັງເປັນເວລາ 1 ເດືອນ ເມື່ອປ່ອຍຕົວອອກມາກໍກັບມາເສບອີກ ແລ້ວຖືກກັກຕົວເປັນຄັ້ງທີ 2 ໃນເດືອນດຽວກັນ ແລະ ມາປີ 2010 ຖືກຜູ້ປົກຄອງນໍາສົ່ງໄປຝາກຢູ່ ສູນບໍາບັດຢາເສບຕິດ ສາຍນໍ້າງື່ມ (ດອນທ້າວດອນນາງ) ເມື່ອອອກມາ ຍັງກັບມາເສບຢາບ້າອີກ ແລະ ຊື້ຊັບຜິດກົດໝາຍ ຈົນຖືກກັກຕົວເປັນຄັ້ງທີ 3 ມາດໍາເນີນຄະດີ.

ແຫຼ່ງທີ່ມາ:ໜັງສືພິມຄວາມສະຫງົບ