3 ສາເຫດ-3 ລັກສະນາ ພາໃຫ້ການສັນຈອນແອອັດ

ປັດຈຸບັນ, ນະຄອນຫຼວງວຽງຈັນ ປະເຊີນໜ້າກັບສະພາບການສັນຈອນແອອັດຕາມເສັ້ນທາງສາຍຕ່າງໆ ເຮັດໃຫ້ການໄປ-ມາພົບຄວາມຫຍຸ້ງຍາກພໍສົມຄວນ. ສາເຫດຂອງການແອອັດ, ບັນຫາໜຶ່ງ ແມ່ນເກີດຈາກພາຫະນະເພີ່ມຂຶ້ນຢ່າງໄວວາ ແຕ່ກົງກັນຂ້າມເສັ້ນທາງບໍ່ສາມາດຮອງຮັບການເພີ່ມຂຶ້ນຂອງພາຫະນະໄດ້ ຕະຫຼອດຮອດຜູ້ໃຊ້ລົດ-ໃຊ້ຖະໜົນຈໍານວນໜຶ່ງ ບໍ່ປະຕິບັດກົດລະບຽບຢ່າງເຂັ້ມງວດ.

ເຈົ້າໜ້າທີ່ພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ເປີດເຜີຍວ່າ: ສາເຫດທີ່ພາໃຫ້ການສັນຈອນແອອັດຢູ່ໃນນະຄອນຫຼວງວຽງຈັນ ມີ 3 ສາເຫດ ແລະ 3 ລັກສະນະ ຄື: ເກີດຈາກຄົນຜູ້ຂັບຂີ່ຈໍານວນໜຶ່ງ ຄວາມຮັບຮູ້ດ້ານລະບຽບກົດໝາຍກ່ຽວກັບການຈະລາຈອນທາງບົກບໍ່ທັນສູງ, ຂາດຄວາມຊໍານິຊໍານານໃນການຂັບຂີ່ຍານພາຫະນະ ເວລາສັນຈອນຕາມເສັ້ນທາງມີການລ່ວງລະເມີດເກີດຂຶ້ນ ແລະ ອີກຈໍານວນໜຶ່ງມີຄວາມຮູ້ທາງລະບຽບກົດໝາຍກ່ຽວກັບຈະລາຈອນທາງບົກ ແຕ່ມີແນວຄິດມັກງ່າຍ, ຂາດຄວາມຮັບຜິດຊອບ ມີເຈດຕະນາລະເມີດ ເຊັ່ນ: ຂັບຂີ່ລົດບໍ່ໄປຕາມຊ່ອງຈະລາຈອນ, ແຊງຕັດໜ້າລົດຄັນອື່ນ, ລ່ວງໄຟແດງ, ລ່ວງປ້າຍຫ້າມ, ຈອດລົດຊະຊາຍຕາມທາງໂຄ້ງ, ທາງແຄບ, ທາງຄົບ-ທາງແຍກ, ມີການສວຍໃຊ້ເສັ້ນທາງເປັນບ່ອນຝາກລົດ, ມີການສ້ອມແປງ, ຂາຍເຄື່ອງ, ວາງວັດສະດຸກໍ່ສ້າງ, ກອງດິນ-ຫີນຊາຍ ແລະ ສິ່ງຂອງຕ່າງໆ. ນອກນັ້ນ, ເກີດຈາກການຄອບຄຸມ, ບໍລິຫານ ແລະ ການຈັດການວຽກງານຂອງເຈົ້າໜ້າທີ່ທີ່ກ່ຽວຂ້ອງ ການກໍານົດເສັ້ນທາງ ແລະ ເວລາໃຫ້ລົດບັນທຸກໜັກ, ລົດຂົນສົ່ງສິນຄ້າ, ລົດບໍລິການ ແລ່ນຕາມເສັ້ນທາງໃນຕົວເມືອງບໍ່ທັນເຂັ້ມງວດ; ການກໍານົດເວລາເຂົ້າການ-ເລີກການຂອງພະນັກງານລັດ, ເອກະຊົນ ແລະ ເວລາເຂົ້າຮຽນ-ເລີກຮຽນຂອງນັກຮຽນ-ນັກສຶກສາ ແມ່ນເວລາດຽວກັນ ຕະຫຼອດຮອດການຈັດສັນການຈອດລົດສາທາລະນະທີ່ມີແລ້ວ ຍັງບໍ່ທັນເໝາະສົມ; ເກີດຈາກຍານພາຫະນະ: ພາຫະນະທີ່ນໍາໃຊ້ສ່ວນໃຫຍ່ແມ່ນລົດເກົ່າທີ່ນໍາໃຊ້ມາດົນ ບໍ່ໄດ້ຮັບການກວດກາທາງດ້ານເຕັກນິກ, ລະບົບລູກໜາກຄັນສົ່ງບໍ່ດີ, ຈັກດັບ, ເປ່ເພຢູ່ກາງທາງ; ເກີດຈາກສະພາບເສັ້ນທາງ ແລະ ສະພາບແວດລ້ອມ: ຖະໜົນຢູ່ຕາມເທດສະບານເມືອງ ໃນນະຄອນຫຼວງວຽງຈັນ ເປັນຜັງເມືອງເກົ່າ, ບໍ່ສາມາດກໍ່ສ້າງ ຫຼື ຂະຫຍາຍອອກໄດ້ຕື່ມ, ທາງແຄບ, ທາງຄົບສາມແຍກ, ສີ່ແຍກ ຈຸດປ່ຽນທິດທາງມີຫຼາຍຈຸດຄັບແຄບ ບໍ່ມີຂົວ ຫຼື ທາງລອດພື້ນສໍາລັບຄົນຍ່າງຂ້າມ, ທາງຫຼຸບໂນນ, ເປັນຂຸມເປັນບໍ່, ບາງເສັ້ນທາງເປ່ເພ ແລະ ການສ້ອມແປງຍັງຊັກຊັກ; ການຕິດຕັ້ງປ້ານສັນຍານຈະລາຈອນ ແລະ ເຄື່ອງໝາຍທາງຕາມຂອບທາງ, ບ່າທາງ, ຈຸດສາມແຍກ, ສີ່ແຍກ ບໍ່ສອດຄ່ອງກັບສະພາບຕົວຈິງ ຈຶ່ງເຮັດໃຫ້ການຕິດຕັ້ງລະບົບໄຟອໍານາດບໍ່ເປັນເອກະພາບກັນກັບການປຸກສ້າງທີ່ຕັ້ງສໍານັກງານ, ໂຮງຮຽນ, ໂຮງແຮມ, ທະນາຄານ, ຮ້ານອາຫານ, ຕະຫຼາດ, ຄິວລົດ. ພ້ອມນີ້, ຍັງເຫັນວ່າບ່ອນຈອດລົດບໍ່ພຽງພໍ ຈຶ່ງໄດ້ມີການນໍາໃຊ້ເສັ້ນທາງເປັນບ່ອນຈອດລົດ….

ສ່ວນ 3 ລັກສະນະ ພາໃຫ້ການສັນຈອນແອອັດ ຄື: ລັກສະນະປົກກະຕິ ເກີດຂຶ້ນຢູ່ຈຸດໃດໜຶ່ງເປັນເວລາດົນນານແລ້ວ ແຕ່ບໍ່ໄດ້ມີການແກ້ໄຂໃຫ້ດີຂຶ້ນ ຫຼື ແກ້ໄຂເປັນພຽງແຕ່ໄລຍະໜຶ່ງເທົ່ານັ້ນ, ລັກສະນມີເຫດການ ແມ່ນເກີດຂຶ້ນໃນຍາມມີກອງປະຊຸມ, ວັນສໍາຄັນ ແລະ ບຸນປະເພນີຂອງຊາດ ເຊິ່ງມີມວນຊົນເປັນຈໍານວນຫຼວງຫຼາຍໃຊ້ລົດ-ໃຊ້ຖະໜົນໃນເສັ້ນທາງພື້ນທີ່ດັ່ງກ່າວພ້ອມໃນເວລາດຽວກັນ, ບາງກໍລະນີມີອຸບັດຕິເຫດ, ອັກຄີໄພເກີດຂຶ້ນ ແລະ ເສັ້ນທາງຖືກຕັດຂາດຈາກໄພທໍາມະຊາດ ແລະ ລັກສະນະອີ່ມຕົວ ແມ່ນປະລິມານເປົ້າໝາຍທີ່ເຂົ້າຮ່ວມການສັນຈອນ ຢູ່ຈຸດພື້ນທີ່ໃດໜຶ່ງຫຼາຍກວ່າປະລິມານທີ່ລະບາຍອອກ ເຮັດໃຫ້ເປົ້າໝາຍທີ່ເຂົ້າຮ່ວມການສັນຈອນ ເພີ່ມຂຶ້ນຢ່າງໄວວາ ແລະ ຂະຫຍາຍກວ້າງອອກຢູ່ຕະຫຼອດເວລາ.

ແຫຼ່ງທີ່ມາ: ໜັງສືພິມຄວາມສະຫງົບ LSecurity News