ປກສ ເມືອງຫົງສາ ມ້າງເຄືອຂ່າຍຊື້-ຂາຍຢາບ້າ ພ້ອມຂອງກາງເກືອບ 3 ພັນເມັດ

ໜ່ວຍງານຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງຫົງສາ ແຂວງໄຊຍະບູລີ ໄດ້ມ້າງແກ້ງເຄືອຂາຍຊື້-ຂາຍຢາບ້າ ພາຍໃນເມືອງ ໄດ້ 7 ຄົນ ພ້ອມຢາບ້າທັງໝົດ 2.920 ເມັດ ໄປດໍາເນີນຄະດີຕາມກົດໝາຍ.


ເຈົ້າໜ້າທີ່ວິຊາສະເພາະ ປກສ ເມືອງຫົງສາ ຖະແຫຼງຂ່າວ ໃນວັນທີ 7 ກັນຍາ 2017 ນີ້ວ່າ: ເປົ້າໝາຍຈໍານວນດັ່ງກ່າວ ແມ່ນເປັນເຄືອຂ່າຍທີ່ລັກລອບຊື້-ຂາຍຢາເສບຕິດພາຍໃນເມືອງ ໂດຍແມ່ນໄດ້ປະສານສົມທົບກັບພາກສ່ວນທີ່ກ່ຽວຂ້ອງ ເຂົ້າຕິດຕາມຈັບຕົວໄດ້ໃນໄລຍະວັນທີ 30 ສິງຫາ-6 ກັນຍາ 2017 ເຊິ່ງໃນນັ້ນ ມີ ທ້າວ ຊານເຊັງ ແຊຈ່າວ ອາຍຸ 19 ປີ ປະຊາຊົນບ້ານ ທົ່ງຄັງ ເມືອງ ນານ ແຂວງ ຫຼວງພະບາງ ພ້ອມຢາບ້າ 2.000 ເມັດ, ລົດຈັກ 1 ຄັນ, ໂທລະສັບມືຖື 1 ໜ່ວຍ ແລະ ເງິນກີບ 7 ລ້ານກວ່າກີບ. 


ທ້າວ ໂພຄຳ ສີສົມວົງ ອາຍຸ 24 ປີ ຢູ່ບ້ານ ໂພນໄຊ ເມືອງ ຫົງສາ ແຂວງ ໄຊຍະບູລີ ມີຢາບ້າ 47 ເມັດ ແລະ ໂທລະສັບມືຖື 1 ໜ່ວຍ. ທ້າວ ເລົາ ວາງ ອາຍຸ 20 ປີ ພົບຂອງກາງຢາບ້າ 800 ເມັດ, ລົດຈັກ 1 ຄັນ ແລະ ໂທລະສັບ 2 ໜ່ວຍ, ທ້າວ ເຕັງ ວາງ ອາຍຸ 40 ປີ ພົບຂອງກາງຢາບ້າ 21 ເມັດ ແລະ ໂທລະສັບມື 1 ໜ່ວຍ ທັງສອງຢູ່ບ້ານ ນໍ້າເງິນ ເມືອງ ເງິນ ແຂວງ ໄຊຍະບູລີ. 

ທ້າວ ໄຊ ໄຊຊະວົງ ອາຍຸ 19 ປີ, ທ້າວ ນິກ ສຸກກະເສີມ ອາຍຸ 19 ປີ, ທ້າວ ບຸນ ສີວິໄລ ອາຍຸ 32 ປີ, ທັງສາມຄົນຢູ່ບ້ານ ນໍ້າຕັບ ເມືອງ ຫົງສາ ແຂວງ ໄຊຍະບູລີ ພ້ອມຢາບ້າຢາບ້າ 52 ເມັດ, ລົດຈັກ 1 ຄັນ 
ທີ່ພວກກ່ຽວນຳໃຊ້ເຂົ້າໃນການເຄື່ອນໄຫວກະທຳຜິດ ເຈົ້າໜ້າທີ່ຈຶ່ງຢຶດໄວ້ເປັນຫຼັກຖານມາ ດໍາເນີນຄະດີຕາມລະບຽບກົດໝາຍ.

ປັດຈຸບັນຄະດີດັ່ງກ່າວ ແມ່ນຢູ່ໃນຂັ້ນຕອນດຳເນີນການສືບສວນ-ສອບສວນ ເພື່ອຂະຫຍາຍຜົນຫາ ຜູ້ຮ່ວມຂະບວນການດຽວກັນ ມາດໍາເນີນຄະດີຕາມລະບຽບກົດໝາຍຂອງບ້ານເມືອງ.


+ຂ່າວຈາກ: ໜັງສືພິມ ປກສ.