ສະກັດກວດຄົ້ນລົດເກັງ ພົບເຮໂຣອິນ 48 ແທ່ງ

ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ໄດ້ສະກັດກວດຄົ້ນລົດເກັງອີແລນຕຣາ ພົບເຫັນຢາເສບຕິດ ປະເພດເຮໂຣອິນ ຈຳນວນ 48 ແທ່ງ ຢູ່ຈຸດກວດກາບ້ານນາຫຼວງ ເມືອງຫ້ວຍຊາຍ ແຂວງບໍ່ແກ້ວ ໃນວັນທີ 17 ກັນຍາ 2017 ພ້ອມທັງກັກຕົວຜູ້ຖືກຫາ 2 ຄົນ ໄປສອບສວນຂະຫຍາຍຜົນຫາຜູ້ຮ່ວມຂະບວນການ.

ເຈົ້າໜ້າທີ່ວິຊາສະເພາະ ປກສ ແຂວງບໍ່ແກ້ວ ເປີດເຜີຍວ່າ: ກ່ອນມ້າງຄະດີລາຍນີ້ໄດ້ ແມ່ນໄດ້ຮັບລາຍງານຈາກພົນລະເມືອງດີວ່າ ຈະມີກຸ່ມຄົນບໍ່ດີຈໍານວນໜຶ່ງ ເຄື່ອນໄຫວຂົນສົ່ງຄ້າ-ຂາຍຢາເສບຕິດ ປະເພດເຮໂຣອິນ ຈາກເມືອງຫ້ວຍຊາຍ ແຂວງບໍ່ແກ້ວ ໄປແຂວງຫຼວງພະບາງ. ໂດຍນໍາໃຊ້ລົດເກັງເປັນພາຫະນະຂົນສົ່ງໃນຄັ້ງນີ້. ດັ່ງນັ້ນ, ເຈົ້າໜ້າທີ່ວິຊາສະເພາະ ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງ ລົງຕັ້ງດ່ານກວດກາຢູ່ບ້ານນາຫຼວງ ເມືອງຫ້ວຍຊາຍ ແຂວງບໍ່ແກ້ວ; ໃນຂະນະນັ້ນ, ໄດ້ພົບເຫັນລົດເກັງອີແລນຕຣາ ສີຂາວ ບໍ່ມີໝາຍເລກທະບຽນ ແລ່ນດ້ວຍຄວາມໄວສູງ ຈຶ່ງສະກັດກວດຄົ້ນ. ຜ່ານການກວດຄົ້ນ ພົບເຫັນຢາເສບຕິດ ປະເພດເຮໂຣອິນ ຈຳນວນ 24 ຄູ່ ເທົ່າກັບ 48 ແທ່ງ ຊຸກເຊື່ອງຢູ່ໃນລົດ ແລະ ໂທລະສັບມືຖື 2 ໜ່ວຍ, ປື້ມບັນຊີເງິນຝາກທະນາຄານ 1 ຫົວ, ປື້ມພາດສະປອດ 1 ຫົວ, ໂມງ 1 ໜ່ວຍ ແລະ ສາຍຄໍເງິນ 1 ເສັ້ນ ພ້ອມທັງກັກຕົວຜູ້ຂັບຂີ່ຊື່ ທ້າວ ກົວເນັ່ງຊົງອາຍຸ 31 ປີ ຢູ່ບ້ານຊາງ ເມືອງນໍ້າບາກ ແຂວງຫຼວງພະບາງ ແລະ ຜູ້ຂີ່ມານໍາຊື່ ທ້າວ ຍົ່ງຍີ່ວື ອາຍຸ 29 ປີ ຢູ່ບ້ານໂພນສະຫວັນ ເມືອງແປກ ແຂວງຊຽງຂວາງ. ສ່ວນຜູ້ຍິງທີ່ຂີ່ມານໍາກັນ ແມ່ນເອົາຕົວຫຼົບໜີໃນເວລາກຳລັງກວດຄົ້ນລົດ.

ຜ່ານການສືບສວນ-ສອບສວນ ທ້າວ ກົວເນັ່ງຊົງ ຮັບສາລະພາບວ່າ: ເຮໂຣອິນ ຈໍານວນດັ່ງກ່າວແມ່ນຂອງຜູ້ກ່ຽວແທ້ ເຊິ່ງໄດ້ຮັບມາຈາກຄົນມຽນມາ ເພື່ອຈະນໍາໄປສົ່ງໃຫ້ຜູ້ສັ່ງຊື້ ຢູ່ແຂວງຫຼວງພະບາງ ແຕ່ກໍຖືກຈັບຕົວກ່ອນ. ສ່ວນ ທ້າວ ຍົ່ງຍີ່ວື ແມ່ນຍັງໃຫ້ການປະຕິເສດວ່າ ບໍ່ຮູ້ເຫັນກ່ຽວກັບເຮໂຣອິນຈຳນວນດັ່ງກ່າວ ພຽງແຕ່ຂໍຕິດລົດໄປນຳເທົ່ານັ້ນ. ສ່ວນຜູ້ຍິງທີ່ເອົາຕົວລົບໜີໄປນັ້ນ ເຈົ້າໜ້າທີ່ກໍາລັງເລັ່ງຊອກຫາຕົວ ເພື່ອມາສອບສວນດໍາເນີນຄະດີຕາມລະບຽບກົດໝາຍ.

ແຫຼ່ງທີ່ມາ: ໜັງສືພິມຄວາມສະຫງົບ