ລັດຖະບານລາວ ຊະນະການຕໍ່ສູ້ຄະດີກັບ ບໍລິສັດໄທ-ລາວ ລິກໄນ

ຂປລ. ອີງ​ຕາມ​ແຫລ່ງຂ່າວ ​ຈາກ​ກະຊວງ​ແຜນການ​ ​ແລະ ການ​ລົງ​ທຶນ ລັດຖະບານ​ແຫ່ງ ສປປ ລາວ ​ໄດ້​ຊະ​ນະ​ການ​ຕໍ່ສູ້​ຄະດີ​ຄວາມທາງກົດໝາຍ ​ທີ່​ມີ​ຄວາມ​ຍືດ​ເຍື້ອຍາວ​ນານ​ກັບ ບໍລິສັດ ​ໄທ-​ລາວ​ລິກ​ໄນ ຈຳກັດ (Thai-Lao Lignite Co., Ltd ). ລັດຖະບານ​ໄດ້​ອະນຸມັດ​ການ​ສຳ​ປະທານ ​ສອງໂຄງການຄື ​ໂຄງການ​ຂຸດ​ຄົ້ນ​ຖ່ານ​ຫີນ ​ແລະ ໂຄງການ​ການ​ກໍ່ສ້າງ​ໂຮງງານ​ ໄຟຟ້າ​ພະລັງ​ຄວາມ​ຮ້ອນ​ຂະໜາດ 700 MW ທີ່​ເຂດ​ຫົງ​ສາ ​ໃນ​ປີ 1992 ​ແລະ 1994 ຕາມ​ລຳດັບ ເປັນ​ເວລາ​ປະມານ 13 ປີ, ພາຍຫລັງ​ການ​ໃຫ້​ສຳ​ປະທານ​ໂຄງການ​ດັ່ງກ່າວ, ​ຈາກ​ລັດຖະບານ, ບໍລິສັດ ​ໄທ-​ລາວ​ລິກ​ໄນ ຈຳກັດ ​ແມ່ນ​ລົ້ມ​ເຫ​ລວ​ໃນ ການ​ບໍ່​ປະຕິບັດ​ຕາມ​ຄວາມມຸ່ງ​ຫວັງ​ຂອງ​ຕົນ, ​ເຊິ່ງສະ​ແດງ​ອອກ ​ທີ່​ບໍ່​ສາມາດ​ບັນລຸ​ການ​ພັດ​ທະນາ​ຢ່າງ​ເຕັມ​ສ່ວນ ​ຂອງ​ໂຄງການ​ພະລັງງານ​ຄວາມ​ຮ້ອນ​ຫົງ​ສາ.

  ເພື່ອ​ເປັນ​ການ​ຮັກສາ​ແຜນການ​ພັດທະນາ​ຂອງ​ປະ​ເທດ. ດັ່ງ​ນັ້ນ, ​ລັດຖະບານ​ລາວ​ຈຶ່ງ​ໄດ້​ຍົກ​ເລີກ​ໂຄງການ​ສຳ​ປະທານ​ດັ່ງກ່າວ​ ໃນ​ປີ 2007. ​ເພື່ອ​ບໍ່​ເປັນ​ການ​ຊັກ​ຊ້າ, ລັດຖະບານ​ລາວ​ໄດ້​ຮຽກຮ້ອງ​ໃຫ້​ບັນ ດາ​ນັກ​ລົງທຶນ​ຜູ້​ທີ່​ມີ​ທ່າ​ແຮງ​ ເຊິ່ງ​ໃນ​ນັ້ນ​ລວມມີ​ບໍລິສັດ ບ້ານ​ປູມະຫາຊົນຈຳກັດ ​ໃຫ້​ຍື່ນ​ສະ​ເໜີ​ໂຄງການ​ເພື່ອ​ພັດທະນາ​ໂຄງການ​ ໂຄງການ​ພະລັງງານ​ໃຫ້​ໄປ​ຕາມ​ຄາດໝາຍ, ການສະ​ເໜີ​ໂຄງການ​ດັ່ງ​ກ່າວ ​ຂອງ​ບໍລິສັດ​ບ້ານ​ປູ ​ໄດ້​ຮັບ​ການ​ຄັດ​ເລືອກ​ຈາກ​ອີກ​ສອງ​ບໍລິສັດ​ ທີ່​ຍື່ນ​ສະ​ເໜີມາ ຍ້ອນ​ວ່າ​ບໍລິສັດ​ບ້ານ​ປູ​ມີ​ປະສົບ​ການ​ດ້ານການ​ພັດທະນາ​ໂຄງການ ​ພະລັງງານ​ຄວາມ​ຮ້ອນ​ ​ແລະ ມີ​ຄວາມ​ຊຳນານ​ໃນ​ການ​ເຮັດ​ບໍ່​ຖ່ານ​ຫີນ.

ບໍລິສັດ​ບ້ານ​ປູ ມະຫາຊົນ ຈຳກັດ ​ໄດ້​ປະຕິບັດ​ຕາມ​ຄວາມ​ມຸຸ່ງຫວັງ ​ຂອງ​ຕົນ​ຢ່າງ​ເຕັມ​ສ່ວນ ​ໂດຍ​ໄດ້​ສ້າງ​ໂຮງງານ​ຜະລິດ​ໄຟຟ້າ ​ແລະ ​ໄດ້​ຕິດ​ຕັ້ງ​ເຄື່ອງ​ຈັກ ​ທີ່​ມີ​ກຳລັງ​ການ​ຜະລິດ​ພະລັງງານ​ຂະໜາດ 600 MW ສາມເຄື່ອງ ເຊິ່ງລວມທັງໝົດເປັນ 1.800 MW ເພື່ອຂາຍໃຫ້ແກ່ບໍລິສັດໄຟຟ້າລາວ ແລະ ບໍລິສັດ ການຜະລິດໄຟຟ້າແຫ່ງປະເທດໄທ ຕາມຕາຕະລາງການຜະລິດເພື່ອຂາຍທີ່ກຳນົດໄວ້. ລັດຖະບານລາວ ມີຄວາມພາກພູມໃຈ ທີ່ເຮັດໃຫ້ໂຄງການພະລັງງານຄວາມຮ້ອນຫົງສາ ສາມາດກ້າວເຂົ້າສູ່ການຜະລິດ ພະລັງງານໄຟຟ້າ ເພື່ອຕອບສະໜອງຕາມຄວາມຕ້ອງການຊົມໃຊ້ໄຟຟ້າ ຂອງປະເທດໄທ ແລະ ລາວ.

ເຖິງຢ່າງ​ໃດ​ກໍຕາມ,  ບໍລິສັດ​ໄທ-ລາວລິກ​​ໄນ​ຈຳກັດ ​ໄດ້​ລິ​ເລີ່​ມຂະ​ບວນ​​ໄກ່​​ເກ່ຍ ກັບ​ລັດຖະບານ​ລາວ ທີ່​ກົວລາ​ລຳ​ເປີ​ ໃນ​ຂໍ້​ຫາ​ລະ​ເບີດ​ສັນຍາ. ພາຍ​ໃຕ້​ການ​ປະຕິ​ເສ​ດຢ່າງ​ໜັກ​ແໜ້ນ​ຂອງ​ລັດຖະບານ,  ບໍລິສັດ​ໄທ-ລາວລິກ​ໄນ​ ຈຳກັດ​ ຕ້ອງການ​ຄ່າ​ເສຍ​ຫາຍ​ຈາກ ສອງ​ໂຄງການ ​ທີ່​ໄດ້​ອະນຸມັດ​ໃຫ້​ບໍລິສັດ ​ໄທ-ລາວລິກ​ໄນ​ຈຳກັດ, ຄະນະ​ກຳມະການ​ໄກ່​ເກ່ຍ​ໄດ້​ຜິດພາດ ​ໃນ​ການ​ເຫັນ​ດີ​ຕໍ່​ການ​ຮຽກຮ້ອງ​ຄ່າ​ເສຍ​ຫາຍ​ຂອງ​ບໍລິສັດ ​ເຊິ່ງຄຳ​ຕັດສິນ​ໃນ​ເດືອນ​ທັນວາ 2009 ​ແມ່ນ​ຕັດສິນ​ໃຫ້​ລັດຖະບານ​ມອບ​ເງິນ 25 ລ້ານ​ໂດ​ລາ​ໃຫ້​ແກ່​ບໍລິສັດ ​ໄທ-ລາວລິກ​ໄນ ຈຳກັດ, ພ້ອມ​ກັບ​ການ​ຄິດ​ໄລ່​ດອກ​ເບ້ຍ 9% ຕໍ່​ປີ.

     ລັດຖະບານ​ໄດ້​ປະຕິ​ເສດ​ ຕໍ່​ການຈັດ​ຕັ້ງ​ປະຕິບັດ​ຄຳ​ຕັດສິນ​ດັ່ງກ່າວ, ພ້ອມ​ທັງ​ໄດ້​ຮ້ອງ​ຂໍ​ໄປ​ຍັງ​ສານ​ປະ​ເທດ​ມາ​ເລ​ເຊຍ (​ເຊິ່ງ​ເປັນ​ສະຖານ​ທີ່​ຂະ​ບວນການ​ໄກ່​ເກ່ຍຕັ້ງ​ຢູ່) ​ເພື່ອ​ຂັດ​ຄ້ານ​ປະຕິບັດ​ຄຳ​ຕັດສິນ​ຂອງ ຄະນະ​ກຳມະການ​ໄ​ກ່​ເກ່ຍ ​ໃນ​ປີ 2013. ພາຍຫລັງ​ການ​ທົບ​ທວນ​ຄະດີ​ ຢູ່​ສານ​ສູງ​ທີ່​ກູ​ລາ​ລຳ​ເປີ, ສານ​ໄດ້​ຕັດສິນ​ ໃນ​ການ​ໂຈະ​ຄຳ​ຕັດສິນ​ຂອງ​ສູນ​ໄກ່​ເກ່ຍ. ພາຍຫລັງ​ເວລາສາມ​ປີ​ ຂອງ​ການຍື່ນ​ອຸທອນ​ທາງ​ກົດໝາຍ​ຂອງ​ຜູ້​ລົງ​ທຶນ, ​ໃນ​ວັນ​ທີ 17 ສິງຫາ 2017 ສານ​ສູງ​ສຸດ​ປະ​ເທດ​ມາ​ເລ​ເຊຍ ​ແມ່ນ​ໄດ້​ປະຕິ​ເສດ​ການ​ຍື່ນ​ອຸທອນ ຂອງ​ບໍລິສັດ ​ໄທ-ລາວລິກ​ໄນ ຈຳກັດ. ດ້ວຍ​ເຫດ​ນັ້ນ ​ຈຶ່ງ​ເຮັດ​ໃຫ້​ຄະດີ​ຄວາມ​ທີ່​ຍາວ​ນານ​ສິ້ນ​ສຸດ​ລົງ ​ແລະ ສະ​ແດງ​ເຖິງ​ໄຊຊະນະທີ່​ສຳຄັນ​ຂອງ​ລັດຖະບານ​ລາວ.

         ການ​ຕັດສິນ​ໃຈ​ການ​ພັດທະນາ ​ໂຄງການ​ພະລັງງານ​ໄຟຟ້າ​ຫົງ​ສາ​ ຂອງ​ລັດຖະບານ​ລາວ ​ແມ່ນ​ເພື່ອ​ຜົນ​ປະ​ໂຫຍ​ດ ຂອງ​ການ​ພັດທະນາ​ເສດຖະກິດ​ຂອງ ສປປ ລາວ ​​ເຊິ່ງ​ແມ່ນ​ໄລຍະ​ທີ່​ສຳຄັນ​ຂອງ​ການ​ພັດ ທະນາ​ຂະ​ແໜງ​ພະລັງງານ​ໄຟຟ້າ​ຂອງ​ລັດຖະບານອີກ​ດ້ວຍ.