ວາງກຳລັງຕຳຫຼວດເກືອບ 200 ຄົນ ຮັກສາຄວາມສະຫງົບໃນງານບຸນຊ່ວງເຮືອ

ປະເພນີງານບຸນຊ່ວງເຮືອທ່າວັດຈັນ ປະຈໍາປີ 2017 ກົງກັບວັນທີ 6 ຕຸລາ ທີ່ຈະມາເຖິງນີ້, ຫຼາຍພາກສ່ວນກໍ່ໄດ້ກຽມຄວາມພ້ອມດ້ານຕ່າງໆປະກອບສ່ວນຮັບໃຊ້ງານດັ່ງກ່າວ. ໃນນັ້ນ, ກອງຕຳຫຼວດຈະລາຈອນ ເມືອງຈັນທະບູລີ ກໍ່ໄດ້ກຽມຄວາມພ້ອມປະມານ 80% ເພື່ອຮັບໃຊ້ໃນງານບຸນຊ່ວງເຮືອດັ່ງກ່າວ.

ທ່ານ ວົງສຸກໃຈ ວົງຊາລະສິດ ຫົວໜ້າກອງຕຳຫຼວດ ຈະລາຈອນ ເມືອງຈັນທະບູລີ ເຜີຍໃຫ້ຮູ້ວ່າ: ການກະກຽມຄວາມພ້ອມໃນງານບຸນຊ່ວງເຮືອທ່າວັດຈັນປີ 2017 ແຜນວຽກປ້ອງກັນຂອງໜ່ວຍງານຈະລາຈອນແມ່ນໄດ້ມີການກະກຽມແລ້ວຄື: ສະເພາະເມືອງຈັນທະບູລີ ມີ 15 ຈຸດ ມີກຳລັງ 100 ຄົນ(ກຳລັງຂອງເມືອງມີ 50 ຄົນ ແລະ ຈະລາຈອນນະຄອນຫຼວງ 50 ຄົນ).

ໂອກາດດຽວກັນ, ພວກເຮົາຈຶ່ງໄດ້ສົມທົບກັບຫົວໜ້າຈະລາຈອນ ເມືອງສີໂຄດຕະບອງ ແລະ ເມືອງສີສັດຕະນາກຄື: ຢູ່ເມືອງສີໂຄດຕະບອງມີ 8 ຈຸດ ມີກຳລັງຈຳນວນ 30 ຄົນ ແລະ ເມືອງສີສັດຕະນາກ 7 ຈຸດ ມີກຳລັງ 25 ຄົນ, ນອກນີ້ພະແນກຈະລາຈອນນະຄອນຫຼວງກໍ່ໄດ້ສົ່ງມາສົມທົບອີກ ຈຳນວນ 40 ຄົນ, ລວມມີ ຈຸດປ້ອງກັນປະຈຳການ ທັງໝົດ 30 ຈຸດ ມີກຳລັງທັງໝົດ 195 ຄົນ.
(ແຫ່ລງຂ່າວຈາກເສດຖະກິດ-ການຄ້າ)