ປະຊາຊົນສາມາດຈັບໄດ້ປາຝາຂະໜາດຍັກຢູ່ແມ່ນ້ຳຂອງ(ຈະຜິດກົດໝາຍວ່າຄຸມຄອງສັດນໍ້າແລະສັດປ່າຫຼືໍບໍ?)

ເປັນຂ່າວດີ ຫຼື ຂ່າວບໍ່ດີ ທີ່ປະຊາຊົນສາມາດຈັບໄດ້ປາຝາຂະໜາດຍັກຢູ່ແມ່ນ້ຳຂອງ, ຂ່າວດີຄືບ້ານເຮົາຍັງມີຄວາມອຸດົມສົມບູນທາງທຳມະຊາດ, ມີປາໃຫຍ່ຂະໜາດນີ້ອາໄສຢູ່, ສ່ວນຂ່າວບໍ່ດີປານໃດລະແມ່ນວ່າເມື່ອພົບປາແບບນີ້ແລ້ວຈະຄວນແກ່ການອະນຸລັກຕໍ່ໄປ ຕ້ອງປ່ອຍມັນຄືນສູ່ທຳມະຊາດ ຫຼື ຈະນຳມາເປັນອາຫານ?

ປາໂຕດັ່ງກ່າວແມ່ນ ປະຊາຊົນບ້ານດອນສົມ, ເມືອງຄອນ ເຂດສີພັນດອນ ແຂວງຈໍາປາສັກ ຈັບໄດ້ໃນຂະນະທີ່ອອກຫາປາໃນວັນທີ 20/9/2017 ຈັບໄດ້ ຈາກແມ່ນໍ້າຂອງ ຢູ່ບໍລິເວນດ້ານໜ້າຂອງເຮືອນພັກ ດອນສົມ ຊຶ່ງເປັນປາຝາໄລຍັກ ທີ່ມີຂະຫນາດໃຫຍ່ທີ່ສຸດ ເທົ່າທີ່ເຄີຍເຫັນມາ.

ປາຝາໄລ ເປັນສັດນໍ້າປະເພດຫວງຫ້າມຂອງ ສປປ ລາວ ທີ່ໃກ້ຈະສູນພັນ. ຍັງບໍ່ມີການລາຍງານເທື່ອວ່າ ປາທີ່ຈັບໄດ້ ຈະນໍາໄປເຮັດແນວໃດຕໍ່ ?

ໜ້າເສຍດາຍທີ່ລາວອັບເດດໄດ້ພະຍາຍາມຫາກົດໝາຍທີ່ກ່ຽວຂ້ອງແລ້ວ ແຕ່ບໍ່ພົບລາຍການສັດທີ່ເພິ່ນຫວງຫ້າມ ມີພຽງກົດໝາຍວ່າດ້ວຍສັດນ້ຳ ແລະສັດປ່າ  ທີເພິ່ນຂຽນໃສ່ພາກທີ II ປະເພດສັດນ້ຳ ແລະສັດປ່າ ໄດ້ແບ່ງອອກເປັນ 3 ປະເພດ
1. ສັດນ້ຳ ແລະສັດປ່າປະເພດຫວງຫ້າມ
2. ສັດນ້ຳ ແລະສັດປ່າປະເພດຄຸ້ມຄອງ
3. ສັດນ້ຳ ແລະສັດປ່າປະເພດທົ່ວໄປ
ແລະໃນພາກດຽວກັນນັ້ນຍັງລະບຸອີກວ່າສັດນ້ຳ ແລະສັດປ່າປະເພດຫວງຫ້າມ ທີ່ກຳນົດໄວ້ໃນບັນຊີ I ແມ່ນສັດປະເພດທີ່ຫາຍາກ, ໃກ້ຈະສູນພັນ, ມີຄຸນຄ່າສູງ ແລະມີຄວາມສຳຄັນເປັນພິເສດ ຕໍ່ການພັດທະນາເສດຖະກິດ-ສັງຄົມ,ສິ່ງແວດລ້ອມ ແລະການສຶກສາຄົ້ນຄວ້າທາງດ້ານວິທະຍາສາດ ສັດປະເພດດັ່ງກ່າວຕ້ອງໄດ້ຄຸ້ມຄອງກວດກາ, ອະນຸລັກ, ປົກປັກຮັກສາ ແລະພັດທະນາ ສ່ວນການນຳໃຊ້ນັ້ນຕ້ອງໄດ້ຮັບການອະນຸຍາດຈາກລັດຖະບານ.

ກົດໝາຍວ່າດ້ວຍສັດນ້ຳ ແລະສັດປ່າຍັງໄດ້ກຳນົດໄວ້ໃນພາກທີ III ນະໂຍບາຍຕໍ່ຜູ້ມາຜົນງານ ແລະມາດຕະການຕໍ່ຜູ້ລະເມີດ, ມາດຕາ 71 ວ່າດ້ວຍມາດຕະການທາງອາຍາຂໍ້ທີ 1 ຊຶ່ງຂຽນວ່າ:  ສັດນ້ຳ ແລະສັດປ່າທຳມະຊາດ ປະເພດຫວງຫ້າມທີ່ຫາຍາກແລະໃກ້ຈະສູນພັນເຊັ່ນ: ປາຂ່າ, ຊ້າງ, ເສືອໂຄ່ງ, ແຮດ, ຊ້າງ, ເສາຫຼາ, ໝີ, ເມີຍ ແລະງົວບາ. ຜູ້ໃດກະທຳຜິດຈະຖືກດຳເນີນຄະດີອາຍາ ແລະຈະຖືກລົງໂທດຕັດອິດສາລະພາບ ແຕ່ 3ເດືອນຫາ 5 ປີຕາມກໍລະນີໜັກ ຫຼື ເບົາ ແລະປັບໃໝ 200,000 ກີບຂຶ້ນໄປ ລວມທັງການໃຊ້ແທນຄ່າເສຍຫາຍທາງແພ່ງ.

ກົດໝາຍບອກໄວ້ພຽງເທົ່ານີ້ຈິ່ງບໍ່ຮູ້ວ່າໃນຄວາມເປັນຈິງແລ້ວສັດປະເພດຫວງຫ້າມທີ່ເພິ່ນກຳນົດໄວ້ມີຊື່ວ່າແນວໃດ? ຊະນິດໃດແນ່ ເອົາເປັນວ່າທ່ານໃດຮູ້ຂໍ້ມູນກໍ່ປະກອບສ່ວນຊ່ວຍກັນເພື່ອເປັນຄວາມຮູ້ໃຫ້ປະຊາຊົນນໍ!!!!!!!!!

ແຫຼ່ງທີ່ມາ: Khosana ໂຄສະນາ