ສານຕັດສິນສາວຈໍາຄຸກ15ເດືອນຂໍ້ຫາ ສົ່ງຂໍ້ຄວາມຍຸກແຍ່ໃຫ້ແຟນຂ້າຕົວຕາຍ

ສານເຍົາວະຊົນໃນລັດແມສຊາຊູເຊສຂອງສະຫະລັດອາເມຣິກາຕັດສິນໃຫ້ເດັກສາວຄົນໜື່ງຮັບໂທດຈໍາຄຸກ 15 ເດືອນໃນຂໍ້ຫາ ສະໜັບສະໜູນ ໃຫ້ແຟນໜຸ່ມຂ້າຕົວຕາຍຜ່ານການສົ່ງຂໍ້ຄວາມຜ່ານໂທລະສັບ

ສໍານັກຂ່າວຕ່າງປະເທດລາຍງານຈາກເມືອງທອນຕັນ ລັດແມສຊາຊູເຊສ ປະເທດສະຫະລັດອາເມຣິກາ ໃນວັນທີ່ 4 ສິງຫາວ່າ ຜູ້ພິພາກສາ ລໍເຣນຊ ໂມນິຊ ແຫ່ງສານເຍົາວະຊົນແຫ່ງລັດ ແມສຊາຊູເຊສ ຂື້ນນັ່ງບັງລັງອ່ານຄໍາພິພາກສາເມື່ອວັນພະຫັດ ໃຫ້ ນາງ ມິເຊລ ຄາເຕີ ອາຍຸ 20 ປີ ຮັບໂທດຈໍາຄຸກເປັນເວລາ 15 ເດືອນແລະຫຼັງຈາກໄດ້ຮັບອິດສະຫຼະພາບຕ້ອງຢູ່ພາຍໃຕ້ຕິດຕາມແລະຕ້ອງເຂົ້າລາຍງານຕົວກັບເຈົ້າໜ້າທີ່ອີກເປັນເວລາ 5 ປີ ໂທດຖານເປັນຕົ້ນເຫດການເສຍຊີວິດຂອງທ້າວ ຄອນຣາດ ຣອຍແຟນໜຸ່ມຂອງລາວເອງ ດ້ວຍການສົ່ງຂໍ້ຄວາມທາງໂທລະສັບທີ່ມີເນື້ອຫາ ສົ່ງເສີມ ແລະ ຍຸຸແຍ່ປຸກປັ້ນ ໃຫ້ ຣອຍ ຂ້າຕົວຕາຍດ້ວຍການເຂົ້າໄປນອນດົມກາສ ຄາບອນໄດອອກໄຊໃນລົດໃນປີ 2014

ຜູ້ພິພາກສາລໍເຣນຊ ໂມນິຊ

ກ່ອນໜ້ານີ້ໄອຍາການລົງໂທດຈໍາຄຸກລະຫວ່າງ 7-12 ປີ ຈາກບົດລົງໂທດຈໍາຄຸກສູງສຸດຂອງຄະດີນີ້ຢູ່ທີ່ 20 ປີ ໂດຍເຫດຜົນວ່າ ຄາເຕີ ເຊິ່ງໃນເວລານັ້ນ 17 ປີ ພະຍາຍາມສົ່ງເສີມໃຫ້ຣອຍຂ້າຕົວຕາຍ ເພື່ອຮຽກຮ້ອງຄວາມສົງສານ ຈາກສັງຄົມໃຫ້ແກ່ຕົວນາງເອງ ແລະ ຈໍາເລີຍບໍເຄີຍສະແດງທ່າທີສໍານຶກຜິດແກ່ການກະທໍາຂອງຕົນເອງ ແຕ່ຜູ້ພິພາກສາວ່າບົດລົງໂທດສໍາລັບຄາເຕີຕ້ອງມີຄວາມເໝາະສົມ

 ຄອບຄົວນາງ ມິເຊລ ຄາເຕີ

ຄອບຄົວຂອງ ທ້າວ ຄອນຣາດ ຣອຍ

ທາງດ້ານຂອງຄາເຕີໂຕ້ແຍ້ງວ່າ ຜູ້ເສຍຊີວິດມີອາການໂລກຊືມເສົ້າແລະສະແຫວງຫາວິທີການຂ້າຕົວຕາຍເປັນທຶນເດີມຢູແລ້ວແລະຢືນຢັນວ່າຈໍາເລີຍມີຄວາມເສຍໃຈຢ່າງຍິ່ງຕໍ່ເຫດການດັ່ງກ່າວ ແລະກໍາລັງຮັກສາຕົວຈາກການອາການປ່ວຍດ້ວຍໂລກຊືມເສົ້າຢ່າງໜັກແລະພາວະຮັບປະທານອາຫານຜິດປົກກະຕິ ແຕ່ແນວໃດກໍຕາມຄໍາພິພາກສາຖືວ່າສິ້ນສຸດລົງໝາຍຄວາມວ່າຄູ່ກໍລະນີສາມາດຍື່ນອຸທອນໄດ້ແລະຈໍາເລີຍຈະຍັງຄົງເປັນອິດສະຫຼະພາບໃນລະຫວ່າງຍື່ນອຸທອນ

ຄາເຕີແລະຣອຍພົບກັນເປັນຄັ້ງແລກທີ່ລັດຟໍຣິດ່າ ໃນປີ 2012 ລະຫວ່າງທີທັງສອງຝ່າຍຕ່າງໄປທ່ຽວພັກຜ່ອນກັບຄອບຄົວຂອງຕົວເອງຫຼັງຈາກນັ້ນທັງສອງກໍ່ພັດທະນາຄວາມສໍາພັນເລື້ອຍມາ ແຕ່ສ່ວນໃຫຍ່ແມ່ນການສົ່ງຂໍ້ຄວາມທາງໂທລະສັບຫາກັນ