ເປແອສເຊ ເປີດຕົວເນມ່າຢ່າງເປັນທາງການ

ເປແອສເຊ ເປີດຕົວເນມ່າຢ່າງເປັນທາງການ ແລະເຂົ້າເຊັນສັນຍາ 5 ປີ ກ່ອນຊູເສື້ອເປີດຕົວຕໍ່ໜ້າສື່ແລ້ວ ຄາດໄດ້ຮັບຄ່າເມື່ອຍ 625,000 ຢູໂຣຕໍ່ອາທິດ

ເນມ່າ ກອງໜ້າທີມຊາດບຣາຊິວ ເຊັນສັນຍາຢ່າງເປັນທາງການກັບ ປາຣິສ ແຊງ-ແຊກແມງ ທີມອະພິມະຫາເສດຖີແຫ່ງສຶກ ລີກເອີງ ຝັ່ຣງເສດຮຽບຮ້ອຍແລ້ວໃນວັນສຸກທີ່ 4 ສິງຫາທີ່ຜ່ານມາ ຫຼັງຈາກຍ້າຍຈາກບາເຊໂລນ່າ ດ້ວຍຄ່າຕົວທີ່ເປັນສະຖິຕິໂລກ 198 ລ້ານປອນ ຫຼືປະມານ 222 ລ້ານຢູໂຣ

ເນມ່າເດີນທາງຮອດສະໜາມບິນເລັກເລີ ບູກເຊ່ ປະເທດຝັ່ຣງເສດໃນຊ່ວງເຊົ້າຂອງວັນສຸກ ກ່ອນເຂົ້າໄປເຊັນສັນຍາ 5 ປີ ກັບເປແອສເຊ ແລະຊູເສື້ອເປີດຕົວ ລວມທັງຖະແຫຼງຂ່າວຕໍ່ໜ້າມວນຊົນຄັ້ງທໍາອິດ ສ່ວນຄ່າເມື່ອຍແມ່ນ 625,000 ຢູໂຣຕໍ່ອາທິດ

ດ້ານແຟນບານຂອງ ເປແອສເຊ ກໍດີໃຈກັບການຍ້າຍມາຂອງເນມ່າດາວຍິງໄວ 25 ປີ ຫຼັງພາກັນໄປຢືນແຖວຊື້ເສື້ອໝາຍເລກ 10 ປັກຊື່ເນມ່າຕັ້ງແຕ່ຕອນ 6 ໂມງເຊົ້າ