ຕັດອິດສະລະພາບ 2 ຈໍາເລີຍ ຖານຄ້າຂາຍຢາເສບຕິດ

ໃນທ້າຍອາທິດຜ່ານມາ, ຄະ ນະສານອາຍາສານປະຊາຊົນຂັ້ນຕົ້ນ ແຂວງອຸດົມໄຊ ນຳເອົາສຳນວນ ຄະດີຄ້າຂາຍຢາ ເສບຕິດ 2 ເລື່ອງ  ມີຈຳເລີຍ 2 ຄົນ; ເລື່ອງທີ 1 ຊື່ທ້າວ ພອນໄຊ ຫຼື ເຮີ ອາຍຸ 28 ປີ ຢູ່ບ້ານນາແສນຄຳ ເມືອງໄຊ ແລະ ເລື່ອງທີ 2 ຈຳເລີຍຊື່ທ້າວ ທ້າວ ເຢຍເຮີ  ອາຍຸ 28 ປີ ຢູ່ບ້ານ ຮອງທູ ເມືອງງາ ທັງສອງຢູ່ແຂວງ ອຸດົມໄຊ ຂຶ້ນພິຈາລະນາເພື່ອຕັດສິນຕາມກົດໝາຍ.

ໃນສໍານວນຄະດີ ຈຳເລີຍ 1 ຊື່ທ້າວ ພອນໄຊ ໄດ້ສາລະພາບວ່າ:  ໄດ້ລັກລອບຊື້-ຂາຍຢາເສບຕິດແທ້, ຜ່ານມາແມ່ນ ໄດ້ຮັບຊື້ຢາເສບຕິດປະເພດຢາບ້ານຳພັກພວກທີ່ຮ່ວມຂະບວນການນຳກັນມາຂາຍມາຫຼາຍຄັ້ງ;ຖືກເຈົ້າໜ້າທີ່ກັກ ຕົວ ໃນວັນທີ 6 ມີນາ 2017 ພ້ອມເຮໂຣອິນຈຳນວນ 11 ຖົງນ້ອຍ ແລະ ຢາບ້າຈຳນວນ 16 ເມັດ. ສ່ວນຈຳເລີຍທີ 2 ຖືກກັກຕົວ ໃນວັນທີ 15 ພະຈິກ 2016 ໂດຍມີຂອງກາງຢາບ້າຈຳນວນ 65 ເມັດ ທີ່ຈຳເລີຍສາລະພາບວ່າເລີ່ມ ພົວພັນກັບຢາເສບຕິດມາແຕ່ປີ 2015 ແລະ ເຄື່ອນໄຫວຊື້-ຂາຍ ໃນໄລຍະເດືອນເມສາ 2016.

ຜ່ານການຄົ້ນຄ້ວາພິຈາລະນາສໍານວນຄະດີບວກກັບການໄຕສວນຈໍາເລີຍທັງສອງໃນຫ້ອງປະຊຸມສານ ດັ່ງນັ້ນ, ຄະນະສານອາຍາສານປະຊາຊົນຂັ້ນຕົ້ນແຂວງ ອຸດົມໄຊ ໄດ້ຕັດອິດສະລະພາບທ້າວ ພອນໄຊ ຫຼື ເຮີ (ຈໍາເລີຍ 1)   3 ປີ  ແລະ ປັບໃໝ 20.000.  000 ກີບ, ສ່ວນຈໍາເລີຍ  2 ຊື່ທ້າວ ເຢຍເຮີ ຕັດອິດສາລະພາບ 5 ປີ ແລະ ປັບໃໝ 10.000.000 ກີບ.

ແຫຼ່ງທີ່ມາ: ໜັງສືີພີມຄວາມສະຫງົບ